Vanaongd bi’w noar un presentatie van Rob Oudkerk in Wierdn èwes. Behalve oold kamerlid vuur de PvdA en oold wethoolder van Amsterdam is Rob Oudkerk ok de zönne van Virrie Oudkerk-Cohen den in ’n oorlog as verpleegster waarkn in Amsterdam. De presentatie van vanoangnd gung oawer het book “Virrie’s kinderen” wat Rob Oudkerk oawer zien moo harre eskreawn. Un oangd wörn organiseerd duur de stichting “Vier de Vrijheid 80 jaar Wierden en Enter”, de bibliotheek Wierden, de Historische Kring Wederden en natuurlijk bookhandel Reterink woe’j het book konn koopn.

Het was un heeln interessanten aongd woerin Rob Oudkerk verteeln oawer zien moo den in de oorlogsjoarn roem 500 Jödse wichter oet de creche hef ėred van deportatie noar de kampen. Dit verhaal is vuurig joar op televisie èwes in de serie “De Joodse Raad”. Ie munt het mear goan kiekn op NPO Start! Zien moo helpn de wichter te vluchen vuur de Duutsers onderwiel zien grotva as vuurzitter van de Joodse Raad in Amsterdam de Duutsers liesen gaf met naamn van Jödn die konn wörn deporteerd. 
Rob Oudkerk zea ok nog dat zien moo noar’n oorlog völle mear las van de 5000 wichter die te neet har könn redn van de Duutsers dan de 500 die te wàl har èred. En zo zit ie dan as meanske in mekaa…

Behalve Rob Oudkerk was ter ok nog un aandern sprekker, den verteeln oawer Johan de Haas, un Jödsen fotograaf den oorspronkelijk oet Wierdn kwam en den in de oorlogsjoarn de Joodse Raad in Amsterdam op ’n foto har èzet. In het vuurgeslachte van dizzen Johan de Haas kwam un zekere Berendina Meier oet Rectum vuur. Het apatte is dat un bienaam van Meier in Rectum (zie wont er nog steeds!), Moosmeier is. Ik dache aaltied dat het met moos, dat greune spul, te maakn har (misskien atn ze dat völle) mear het zol natuurlijk ok heel good te maakn könn hemn met un Jödsen vuurnaam Moos (Mozes) en het feit dat Berendina was etrouwd met un Jörre. Het hef zich alleanig in Rectum neet duurezet want ik kanne mie neet herinnern dat ze bie Meier Jöds. Zie gungn gewoon in Riesen noar de kaarke.

Dus, al met al un indrukwekkenden aongnd woe’k ok nog wat opsteuke van de locale geschiedenis van Rectum Zo zeej mear, ie leert elken dag nog un stukn bie..

De vrouwe was heel klook en leut direct an het begin van’n aongd Rob Oudkerk eur gekochte book signeren.